उखु किसानको खातामा सिधै अनुदान, नयाँ कार्यविधि जारी

काठमाडौं । सरकारले उखु उत्पादक किसानलाई उपलब्ध गराउँदै आएको प्रोत्साहन अनुदान अब सम्बन्धित किसानको व्यक्तिगत बैंक खातामा सिधै भुक्तानी गर्ने व्यवस्था गरेको छ । अनुदान वितरण प्रक्रियालाई पारदर्शी, व्यवस्थित र प्रभावकारी बनाउन सरकारले ‘उखु उत्पादकलाई प्रोत्साहन अनुदान दिने सम्बन्धी कार्यविधि, २०८३’ जारी गरेको हो ।

कृषि, वन तथा पर्यावरण मन्त्रालयले आर्थिक कार्यविधि तथा वित्तीय उत्तरदायित्व ऐन, २०७६ को दफा ६५ को उपदफा (४) बमोजिम उक्त कार्यविधि जारी गरेको हो । नयाँ व्यवस्थाअनुसार अनुदान लिन इच्छुक उखु उत्पादक किसान, फर्म, समूह तथा सहकारीले प्रत्येक वर्ष साउनदेखि असोज मसान्तभित्र सम्बन्धित स्थानीय तहमा सूचीकरणका लागि निवेदन दिनुपर्नेछ ।