मन्त्री हाङ्गामले भने, ‘सरुवा भइसकेको सचिवले मन्त्रालयको गाडी प्रयोग गर्न मिल्दैन’

विराटनगर । कोशी प्रदेशका उद्योग, कृषि तथा सहकारी मन्त्री खगेनसिंह हाङ्गामले सञ्चार माध्यममा आएजस्तो आफूले सचिवको गाडीको चाबी नखोसेको बताएका छन् ।

मंगलबार साँझ एक भिडियो सन्देश जारी गर्दै उनले मन्त्रालयका सचिव डा. शरणकुमार पाण्डेसँग जोडेर गरिएको प्रचार सही नभएको बताएका हुन् । ‘उहाँ (सचिव) को साउन २६ गते चाहिँ सरुवाको निर्णय भयो । त्यसपछि २८ गते मन्त्रालयको प्रमुख भएको हुनाले उहाँलाई सिस्टममा रमना पत्र आयो । मेरो बुझाइमा उहाँ कृषि तथा पशुपन्छी विकास मन्त्रालय सिंहदरबारको सह–सचिवको रूपमा उहाँ सरुवा हुनुभयो,’ हाङ्गामले भने, ‘सरुवा हुँदै गर्दाखेरि र उहाँ सह(सचिवको रूपमा सरुवा भइसकेपछि उहाँले फेरि भदौ १३ गते चाहिँ कोशी प्रदेशमा मुख्यमन्त्री कार्यालयमा रहने गरी उहाँ प्रदेश सचिव बन्नुभयो । तर प्रदेश सचिव बन्दै गर्दाखेरि २६ गतेदेखि १३ गतेसम्म चाहिँ हाम्रो मन्त्रालय उद्योग कृषि सहकारी मन्त्रालयको गाडी, चालक, क्वाटर सबै उहाँले उपयोग गर्दै आउनुभयो ।’