एलपी ग्यासको अभाव छैन, अस्वाभाविक मागले बजारमा दबाब

धनगढी- सुदूरपश्चिम प्रदेशमा खाना पकाउने एलपी ग्यासको अभाव भएको चर्चा बढे पनि नेपाल आयल निगमको तथ्यांकले आपूर्ति नियमित रहेको देखाएको छ। निगमका अनुसार पछिल्लो समय ग्यासको माग सामान्य अवस्थाको तुलनामा तीव्र बढ्दा बजारमा दबाब सिर्जना भएको हो।

धनगढीस्थित निगमको सुदूरपश्चिम प्रादेशिक कार्यालयका अनुसार चालु आर्थिक वर्षको साउन २४ गतेसम्म प्रदेशमा १ लाख १५ हजार ९९० सिलिण्डर ग्यास बिक्री भइसकेको छ। कार्यालय प्रमुख मनोहर डिसीका अनुसार अघिल्ला दुई आर्थिक वर्षको साउन महिनाको समग्र बिक्रीसँग तुलना गर्दा यसपटक पहिलो २४ दिनमै बिक्रीको मात्रा बढी पुगेको छ।