राष्ट्रिय महिला फुटबल प्रतियोगितामा शनिबार नेपाल प्रहरी र चर्च युनियनको विजयी

उदयपुर । यहाँको गाईघाटस्थित थरुहट रङ्गशाला मैदानमा सञ्चालन भइरहेको राष्ट्रिय महिला फुटबल प्रतियोगिताअन्तर्गत शनिबार भएका खेलमा नेपाल प्रहरीको महिला टोली र चर्च ब्वाइज युनियन महिला टोली विजयी भएका छन् ।

नेपाल प्रहरी र एफसी रियल महिला टोलीबिच भएको पहिलो खेलमा नेपाल प्रहरीले एफसी रियलविरुद्ध १० गोल गरेको थियो । आयोजक अखिल नेपाल फुटबल सङ्घ (एन्फा) का महासचिव किरण राईका अनुसार नेपाल प्रहरीका रेखा पौडेलले छ गोल गरिन् भने मीना देउवाले दुई, पूजा रानाले एक र सिर्जना चौधरीले एक गोल गरेकी थिइन् ।

यस्तै, आजै भएको दोस्रो खेलमा चर्च ब्वाइज युनियन महिला टोली छहारी महिला टोलीविरुद्ध एक गोलले विजयी भयो । खेलको ७६औँ मिनेटमा चर्च ब्याइज, जर्सी नम्बर १० की वर्षा ओलीले छहारी महिला टोलीविरुद्ध गरेको एक गोल नै निर्णायक बन्यो ।

आइतबारको खेल सशस्त्र प्रहरी एपिएफ महिला टोली र पोखरा महिला टोलीबिच हुने आयोजकले जनाएको छ ।

खेलमा १० टोलीले सहभागिता जनाइरहेका छन् भने खेल नकआउट’का आधारमा सञ्चालन भइरहेको महासचिव राईले बताउनुभयो । फाइनल खेल फागुन ९ गते हुनेछ ।