बेतना सिमसार : दुर्लभ जीवजन्तुको आश्रयस्थल, अनुसन्धानको प्रयोगशाला र पर्यटनको नयाँ गन्तव्य

मोरङको बेलबारी नगरपालिका–४ मा रहेको बेतना सिमसार आन्तरिक पर्यटकको रमाइलो गन्तव्य बनेको छ । त्यति मात्रै नभएर जैविक विविधताको संरक्षण, दुर्लभ वन्यजन्तुको आश्रयस्थल, वातावरणीय अध्ययन तथा अनुसन्धान र स्थानीय अर्थतन्त्रको महत्वपूर्ण आधारका रूपमा स्थापित हुँदै गएको छ । प्राकृतिक सम्पदाले भरिपूर्ण बेतना सिमसार पछिल्ला वर्षहरूमा कोशी प्रदेशकै नमुना पर्यटकीय गन्तव्यका रूपमा विकास भइरहेको हो ।

विशेषगरी साइबेरियाबाट आउने दुर्लभ चरादेखि विश्वमै दुर्लभ मानिने ‘मयुर पंखी कछुवा’सम्मको बासस्थान एवं आश्रयस्थल बनेको बेतना पछिल्लो समय विद्यार्थी, अनुसन्धानकर्ता, प्रकृतिप्रेमी र पर्यटकको साझा रोजाइ बन्न पुगेको छ । तर, सबैको रोजाइमा परिरहेको सिमसारले जेनजी आन्दोलनका बेला ठूलो क्षति पनि बेहोर्नु पर्यो ।