योजनाको सङ्ख्याभन्दा गुणस्तर र नतिजा हाम्रो प्राथमिकता हो : मन्त्री तामाङ

बागमती प्रदेशमा विकास र पूर्वाधारका क्षेत्रमा ठुलो लगानी भए तापनि आयोजनाहरू समयमै सम्पन्न नहुने र वर्षौंसम्म रुग्ण अवस्थामा रहने चुनौती देखा परेको छ । बजेट विनियोजनको कमजोर प्रणाली, पर्याप्त अध्ययनविनाको योजना छनोट र फितलो अनुगमन संयन्त्रका कारण आयोजनाहरू रुग्ण हुने गरेको देखिन्छ ।

२०७४ मा प्रदेश सरकार स्थापना भएदेखि नै सुरु गरिएका गौरवका आयोजनाहरू आज पनि अलपत्र अवस्थामा रहेको देखिन्छ । विकासको बजेटलाई आवश्यकता भन्दा बढी छर्ने र राजनीतिक पहुँचका आधारमा योजना छनोट गर्ने विगतको परिपाटीले गर्दा प्रदेशको भौतिक प्रगति सुस्त देखिएको छ ।