कर्मचारीलाई लगाम

नेपाल बन्न सकेन वा बनेन भन्ने विषयको कारण खोतल्दा एउटा अपजस कर्मचारीतन्त्रलाई पनि जाने गरेको छ। कर्मचारीतन्त्र राजनीतिक हस्तक्षेपले मात्रै होइन, आफैं राजनीतिको दलदलमा हुँदा परिणाम दिन असमर्थ छ भनिन्छ।

प्रथम श्रेणी वा विशिष्ट तहमा पुग्नमात्रै होइन, सरुवा र बढुवामा राजनीतिक नेताको फेरो समात्ने कर्मचारी प्रवृत्ति छ। झन् राजनीतिक नेतृत्व पनि कर्मचारीहरूमा समेत आफ्नै रङ खोजी हिँड्छ। तटस्थ र निष्पक्ष भएर कार्यसम्पादन गर्नुपर्ने कर्मचारी दलहरूको सदस्यमात्रै होइन, नेतै पनि छन्। हो, त्यही विकृतिको अन्त्यका लागि कर्मचारीहरू राजनीतिक दलको सदस्य बन्न नपाइने कानुनको तयारी सरकारले गरेको छ, जुन आफैंमा स्वागतयोग्य छ।