नवरात्रको चौथो दिन आज कुष्माण्डा देवीको पूजा, शक्तिपीठमा भक्तजनको चहलपहल

काठमाडौं – बडादसैँअन्तर्गत नवरात्रको चौथो दिन आज देशभरका दुर्गा मन्दिर तथा शक्तिपीठमा कुष्माण्डा देवीको विधिपूर्वक पूजा आराधना गरिँदै छ । आश्विन शुक्ल चतुर्थीका दिन नवदुर्गामध्ये चौथो स्वरूप कुष्माण्डा देवीको पूजा गर्ने धार्मिक परम्परा छ ।

घटस्थापनासँगै सुरु भएको नवरात्रमा नौ दिनसम्म दुर्गाका नौवटा स्वरूपको पूजा आराधना गरिन्छ। सोही परम्पराअनुसार आज बिहानैदेखि काठमाडौं उपत्यकासहित देशका विभिन्न शक्तिपीठमा दर्शन तथा पूजाआजाका लागि भक्तजनको चहलपहल बढेको छ ।