चिकित्सक चौधरीलाई थुनामा पठाउने आदेश

महोत्तरी जिल्ला अदालतले डा. पंकज चौधरीलाई पुर्पक्षका लागि थुनामा पठाउन आदेश दिएको छ। दाइजोसम्बन्धी कसुरमा परेको मुद्दामा अदालतले शुक्रबार रामगोपालपुर नगरपालिका ५ निवासी डा. चौधरीलाई पुर्पक्षका लागि थुनामा पठाउन आदेश दिएको छ । डा. चौधरीको श्रीमती नेहा चौधरीले दाइजोसम्बन्धी कसुरमा उनी विरुद्ध मुद्दा दिएकी थिइन ।

मुद्दामा भएको थुनछेक बहसपछि जिल्ला अदालतका न्यायाधीश हरिप्रसाद शर्मा उपाध्यायको एकल इजलासले चौधरीलाई पुर्पक्षका लागि थुनामा पठाउन आदेश दिएको हो। औरही–१ की २१ वर्षीया नेहा र पंकजको गत फागुन २५ गते विवाह भएको थियो। विवाह भएको केही महिनापछि नेहाले सामाजिक सञ्जालमार्फत श्रीमान र परिवारका अन्य सदस्यले आफूमाथि दाइजोको नाममा हिंसा गरिरहेको भन्दै गुनासो गरेकी थिइन् ।