‘गण्डकी सरकारको नेतृत्वमा कांग्रेस र माओवादी आलोपालो’

पोखरा । राष्ट्रपति निर्वाचनको पूर्व सन्ध्यामा एमाले–माओवादीसहितको गठबन्धन फुटेपछि गण्डकी प्रदेश सरकार धरमराएको छ । साथै एमाले नेतृत्वको गण्डकी सरकारलाई दिएको विश्वासको मत माओवादीले फिर्ता लिने र कांग्रेस—माओवादी मिलेर नयाँ सरकार बनाउने आन्तरिक गृहकार्य जारी छ । माओवादीका एक सांसदका अनुसार गण्डकीमा सरकारको नेतृत्व कांग्रेस—माओवादीले आलोपालो गर्ने सहमति भएको छ ।

‘एमाले नेतृत्वको वर्तमान सरकारलाई दिएको समर्थन कहिले फिर्ता गर्ने भन्ने निर्देशन आइपुगेको छैन । तर, सरकारको नेतृत्व दुवै पार्टीले आलोपालो गर्ने सहमति भएको छ,’ ती सांसदले भने, ‘कुन पार्टीले पहिला नेतृत्व गर्ने भन्ने कुरा हो । मलाई लाग्छ पहिला संविधान अनुसार पनि काङ्ग्रेसकै नेतृत्वमा सरकार बन्छ ।’ माओवादी गण्डकी संसदीय दलका नेता हरिबहादुर चुमानले आइतबार प्रधानमन्त्री पुष्पकमल दाहाल प्रचण्डलाई काठमाडौँमा भेटेर माओवादी नेतृत्वमा सरकार बनाउन पहल गर्न अनुरोध गरेका थिए ।