साउदीमा १३० नेपाली श्रमिकको मृत्यु, ५४४ जना जेलमा

साउदी : वैदेशिक रोजगारीका लागि साउदी अरब पुगेका नेपाली श्रमिकहरूको सुरक्षा, उद्धार, कानुनी सहजीकरण तथा समस्या समाधानमा नेपाली दूतावासले पछिल्लो समय सक्रियता तीव्र बनाएको छ । जेलमा रहेका नेपालीदेखि अस्पतालमा उपचाररत बिरामीसम्मको उद्धार तथा सहजीकरणमा दूतावासले निरन्तर पहल गरिरहेको जनाएको छ ।

दूतावास स्रोतका अनुसार हाल विभिन्न मुद्दा तथा कानुनी प्रक्रियाका कारण ५४४ जना नेपाली साउदी अरबका विभिन्न जेलमा रहेका छन् । श्रम विवाद, कागजात समस्या, आर्थिक लेनदेन, भागेको आरोप, आपराधिक अभियोग तथा प्रशासनिक जटिलताका कारण उनीहरू हिरासतमा रहेको बताइएको छ। दूतावासले नियमित रूपमा जेलमा रहेका नेपालीको अवस्थाबारे जानकारी लिने, कानुनी परामर्श उपलब्ध गराउने तथा रिहाइ र स्वदेश फिर्ताका लागि पहल गरिरहेको जनाएको छ ।