लोकसेवा टपर भन्छन्– ‘असली परीक्षा आउनै बाँकी छ’

काठमाडौँ — कुनै खास तिथिमितिहरू यस्ता हुन्छन्, जसले जीवनको बाटो बदल्छन् । अर्बिन रानाभाटका लागि फागुनको पहिलो दिन यस्तै एउटा नबिर्सने मिति बनेर आयो, जसका कारण उनी हिँड्ने बाटो र अघि बढ्ने दिशा नै बदलिएको छ ।

‘नाम निस्केन भने के गर्ने ?’ लोक सेवाको परीक्षा दिएर बसेका उनको मन घरीघरी एउटा प्रश्नले घोचिरहन्थ्यो, ‘विदेश जाने कि देशमै बस्ने ?’ गएको कात्तिकमा छँदाखाँदाको जागिर छाडेर उनी लोक सेवा तयारीमा लागेका थिए । रातदिन नभनी पढेको पढ्यै गरेका बेला होस् कि परीक्षा दिएर नतिजा कुर्दाका पट्यारलाग्दा दिनमा होस्, उनलाई उही प्रश्नले सताइरहन्थ्यो । सबैजसो दौंतरी अमेरिका, युरोप र अस्ट्रेलिया पुगिसकेका थिए । उनले पनि धेरै पटक जाने सुरसार नगरेका होइनन् । साथीहरूले ‘नेपालमा भविष्य नै छैन’ भनेर एकाएक देश छाडेपछि अर्बिनलाई पनि यहाँ बाँधिराख्ने केही कुरा भएजस्तो लाग्न छाडेको थियो ।