सङ्घीयता जटिल मोडमा छ: मुख्यमन्त्री पाण्डे

पोखरा । गण्डकी प्रदेशका मुख्यमन्त्री सुरेन्द्रराज पाण्डेले नेपालको सङ्घीयता जटिल मोडमा रहेको बताएका छन् । सङ्घीय सरकारले संविधानबाट प्राप्त अधिकार समेत विभिन्न कानुन र ऐन बनाएर फिर्ता लिने काम गरेको भन्दै त्यसले सङ्घीयतामा असर गर्ने उनको भनाई छ । ‘हाम्रो मानसिकता अझै पनि पावर डेलिभर गर्ने कुरामा तयार छैन । यस्ता केही कुराहरू छन् जसले चाहिँ नि हाम्रो सङ्घीयता अलि जटिल बन्दै गएको मैले अनुभव गरेको छु,’ उनले भने, ‘एज अ चिफ मिनिस्टर मेरो दृष्टिकोण भनेको सङ्घीयता जटिल बन्दै गएको अवस्था छ । राजनीतिक दलहरू सङ्घीयताप्रति इमानदार छैनन् ।’

पोखरा विश्वविद्यालय, मानविकी तथा समाजशास्त्र संकायको आयोजनामा बुधबार पोखरामा आयोजित ‘१० वर्षको सङ्घीयता कार्यान्वयन’ विषयक कार्यशालामा उनले सङ्घीयता कार्यान्वयनमा केन्द्रीकृत मानसिकता नै हाबी भएको बताए । पाण्डेले वित्तीय सङ्घीयतामा पनि प्रदेशलाई प्राप्त हुनुपर्ने राजस्व बाँडफाँट र अन्य कुराहरूमा सङ्कुचन गराइएको बताए । प्रदेश सरकारहरूसँग काम गर्ने पुँजी र अधिकारको अभाव रहेकोले जनताका अपेक्षा पूरा गर्न नसकेको उनको तर्क छ ।