२ दिन अलपत्र पर्दा मिर्गौला प्रत्यारोपण गर्न हिँडेका मानबहादुरले एम्बुलेन्समै त्यागे प्राण

महोत्तरीको बर्दिवास नगरपालिका–८, हात्तीलेटका ४५ वर्षीय मानबहादुर सिंजाली अघिल्लो हप्ता मात्रै नेपाल फर्किएका थिए। आज आइतबार आठ दिन मात्रै भयो, उनी भारतबाट आएको।

वडा नम्बर ८ का वडा अध्यक्ष शमशेर सिंहका अनुसार मानबहादुर झन्डै १२ वर्षदेखि परिवारसहित भारतको दिल्लीमा बस्दै आएका थिए। रोजगारीका लागि भारत गएका उनी र उनको परिवार बेलाबखत घर आउजाउ गर्थे। चाडबाड मनाउन र काम विशेषले घर आउने उनी र उनका परिवार यसपटक भने मनमा ठूलो पीडा बोकेर फर्किएको थियो।