किसानको आर्थिक हैसियत उकास्दै ‘कालो सुन’

ताप्लेजुङको मेरिङ्देन गाउँपालिका–१ का ४७ वर्षीय हरि लिम्बूले १० वर्षदेखि अलैंची खेती गर्दै आएका छन्। अघिल्लो वर्ष ३० मन अलैंची उत्पादन गरेका लिम्बूले यस वर्ष उत्पादन राम्रो भएकाले थप पाँच मन उत्पादन बढ्ने अपेक्षा गरेका छन्।

अलैंची खेतीमा उनले पछिल्लो १० वर्षमा ७० लाख रुपैयाँ बढी लगानी गरिसकेका छन्। सुरुमा लगाएका अलैंचीका बिरुवा पुराना हुँदै गएपछि उनले तीन वर्षयता नयाँ बिरुवा रोप्दै आएका छन्। अहिले उनको अलैंची खेती डेढ सय रोपनी क्षेत्रफलमा छ। दुई वर्षपछि नयाँ बिरुवाले उत्पादन दिन थालेपछि उत्पादन ७० मनभन्दा बढी पुग्ने उनको अनुमान छ। त्यसपछि अहिलेसम्म गरेको लगानीको प्रतिफल उठ्ने र आम्दानी पनि बढ्ने उनको विश्वास छ। ‘अहिलेसम्म अलैंचीमा लगानी गरें, अब दुई वर्षपछि रामै आम्दानी होला,’ लिम्बूले भने।