व्यापार सहजीकरणका नीति कागजमा होइन, व्यवहारमै लागू गर्न अध्यक्ष श्रेष्ठको माग

काठमाडौं । नेपाल उद्योग वाणिज्य महासङ्घका अध्यक्ष अञ्जन श्रेष्ठले व्यापार सहजीकरणका लागि बनाइएका नीति र प्रक्रिया कागजमा सीमित नभई व्यवहारमै कार्यान्वयन हुनुपर्ने बताएका छन्। उनले प्रक्रियागत झन्झट हटाउँदै लगानी, उत्पादन, निर्यात र रोजगारी विस्तारका लागि सहज वातावरण बनाउन सरकारसँग आग्रह गरेका छन्।

बुधबार महासङ्घले आयोजना गरेको ‘वर्तमान आर्थिक अवस्था र निजी क्षेत्रको आर्थिक वृद्धिको सम्भावना’ विषयक अन्तरक्रियामा बोल्दै श्रेष्ठले बैंकमा पर्याप्त तरलता, रेमिट्यान्सको निरन्तर प्रवाह र विद्युत् उत्पादन बढे पनि त्यसलाई उत्पादनशील लगानीमा रूपान्तरण गर्न नसकिएको बताए। उनका अनुसार अहिलेको मुख्य चुनौती उपलब्ध स्रोत र सम्भावनालाई उत्पादन, निर्यात तथा रोजगारी सिर्जनामा उपयोग गर्नु हो।