मेलम्ची खानेपानी आयोजना : बाह्रै महीना पानी ल्याउन कठिन

काठमाडौं । ३२ अर्ब रुपैयाँभन्दा बढी खर्च भइसकेको मेलम्ची खानेपानी आयोजनाबाट काठमाडौं उपत्यकामा बाह्रै महीना पानी ल्याउन तत्काल असम्भव देखिएको छ । आयोजनाको माथिल्लो तटमा पहिरोको जोखिम कायमै रहेकाले थप लगानी र उचित प्रविधिको प्रयोग नहुँदासम्म मेलम्ची पानी बाह्रै महीना उपत्यकामा आउन नसक्ने देखिएको हो । सरकारको ठूलो लगानी, वर्षौं सम्मको मेहनत तथा पर्खाइका साथै दातृ निकायको समेत ऋणमा निर्मित मेलम्चीको पानी वर्षायाम शुरू भएसँगै आउन बन्द भएको छ । मनसुन सकिएपछि र २० मीटर पुरिएको अम्बाथानको हेडवर्क्स खनिसकेपछि मात्रै काठमाडौंमा पानी आउने मेलम्ची खानेपानी विकास समितिले जानकारी दिएको छ । मनसुन रहेसम्म मेलम्चीको पानी काठमाडौंमा आउने छैन । यो क्रम वर्षौं दोहोरिरहने सरोकारवाला विज्ञहरू बताउँछन् ।

२०७८ असारको बाढीले आयोजनास्थल प्रभावित त छ नै त्यसभन्दा माथिल्लो तट भ्रेमाथाङमा गेग्रान थुप्रिएकाले पुन: भीषण पहिरो आउन सक्ने जोखिम कायमै रहेको एशियाली विकास बैंक (एडीबी)को हालैको प्रतिवेदनले देखाएको छ । केही साताअघि एडीबीले समितिलाई प्रतिवेदन बुझाएको छ । एडीबीले हेडवर्क्सभन्दा २२ किलोमीटरमाथि पेम्दाङ र मेलम्ची खोलाको अध्ययन गरेको हो ।