२२ अर्बको तटबन्ध चुनौतीबीच नारायणी किनारलाई सुन्दर बनाउने योजना

काठमाडौं – नारायणी नदीको बाढीले नारायणगढ बजार आसपासका संरचना बगाउने र बस्तीमा जोखिम बढाउने क्रम रोकिएको छैन । हरेक वर्ष बाढी र कटानको त्रास झेल्नुपर्ने अवस्थाबीच अहिले नदी किनारलाई व्यवस्थित र आकर्षक बनाउने योजना अघि सारिएको छ । तर नारायणी किनारलाई मनोरञ्जनस्थलका रूपमा विकास गर्नुअघि नदीलाई सुरक्षित बनाउने चुनौती छ, जसका लागि २२ अर्ब रुपैयाँभन्दा बढी खर्च लाग्ने अनुमान गरिएको छ ।

नारायणी नदीमा असोज ११ गते आएको बाढीपछि गरिएको स्थलगत अध्ययनले चितवन र नवलपरासीतर्फ गरी ६० किलोमिटर तटबन्ध आवश्यक रहेको देखाएको छ । चितवनतर्फ १५ किलोमिटर र नवलपरासीतर्फ ४५ किलोमिटर तटबन्ध निर्माण गर्नुपर्ने अध्ययनको निष्कर्ष छ । तर यति ठूलो संरचना निर्माणका लागि आवश्यक बजेट जुटाउन नसके नदी कटानको जोखिम आगामी वर्ष पनि कायम रहने सिँचाइ तथा जलस्रोत व्यवस्थापन आयोजना, भरतपुरले जनाएको छ ।