रास्वपाकाे केन्द्रीय सदस्यबाट नाम हटाइएपछि के भने सोम शर्माले ?

काठमाडौं । राष्ट्रिय स्वतन्त्र पार्टी (रास्वपा) को महाधिवेशनबाट गण्डकी भूगोलतर्फ केन्द्रीय सदस्यमा निर्वाचित भएका सोम शर्माले आफ्नो नाम निर्वाचित सदस्यहरूको अन्तिम सूचीबाट हटाइएको भन्दै पार्टीको महाधिवेशन निर्वाचन आयोगसँग तत्काल स्पष्टीकरण माग गरेका छन्।

शर्माले जारी गरेको निवेदनमा आफू गण्डकी भूगोलबाट ९९३ मतसहित चौथो उच्च मत प्राप्त गरी विधिवत् निर्वाचित भएको र निर्वाचन समितिले आधिकारिक रूपमा निर्वाचित घोषणा गरिसकेको उल्लेख गरेका छन्। निर्वाचन परिणाम सार्वजनिक हुँदा मतगणनामा भएको त्रुटिका कारण आफ्नो नाम कैफियतमा छुटेको भए पनि पछि निर्वाचन समितिले गल्ती स्वीकार गर्दै क्षमायाचना गरी सच्याइएको सूची पुनः प्रकाशन गरेको उनले स्मरण गराएका छन्।