अपत्यारिलो अन्डरराइटिङ रद्द गरौं

घोराही सिमेन्टको प्राथमिक सेयर किन्ने प्रत्याभूति (अन्डरराइटिङ) सम्झौता गरेको नागरिक लगानी कोषलाई अहिले त्यो उद्योगको सेयर निल्नु न ओकल्नु भएको छ। कारण– जतिबेला कोषले उसको सेयर किन्ने प्रत्याभूति दियो, त्यतिखेर नेपाल धितोपत्र बजार २१ सय अंक हाराहारीमा थियो।

उस्तै उद्योगको सेयर मूल्य दोस्रो बजारमा आठ सय रुपैयाँ हाराहारीमा थियो। त्यस्तो बेला प्रतिकित्ता चार सय र ४ सय ३० रुपैयाँमा प्राथमिक सेयर बिक्रीको जिम्मेवारी पाउने सम्झौता गर्न पाउनु कोषले मौका ठान्नु अस्वाभाविक थिएन। उद्योग प्रभावित क्षेत्रका बासिन्दालाई प्रतिकित्ता चार सय र अरू सर्वसाधारणलाई त्योभन्दा ३० रुपैयाँ बढीमा सेयर बिक्री गर्ने र बिक्री नभई बाँकी रहे आफूले किन्ने सम्झौता कोषले पोहोर साउनमा गर्नु स्वाभाविक थियो।