१३० विघामा लगाइएको अफिम खेती प्रहरीद्वारा नष्ट

राक्सिराङ गाउँपालिका र कैलाश गाउँपालिकाका विभिन्न स्थानमा १ सय ३० बिघा जमिनमा अवैध रूपमा लगाइएका अफिम खेती तथा २८ बिघा १० कठ्ठा जमिनमा लगाइएको गाँजा खेती प्रहरीले नष्ट गरेको छ ।

मंगलबार जिल्ला प्रहरी कार्यालय मकवानपुर र सशस्त्र प्रहरी बलबाट संयुक्त रूपमा खटिएको टोलीले उक्त खेती नष्ट गरेको प्रहरीले जनाएको छ । जसमध्ये राक्सिराङ गाउँपालिका –४ मा रहेको चैत, देबिटार र चौकिदार एरियाको साथै सोही गाउँपालिका–६ अन्तर्गत काङद्राङ, काम्ले, नारायणी र अईनाटर एरियामा लगाइएको अफिम तथा गाँजा नष्ट गरिएको छ ।