सीमित स्रोत, भारी अपेक्षा: कसरी हुन्छ पूरा ?

विराटनगर । कोशी प्रदेश सरकारले आगामी आर्थिक वर्ष (२०८३/०८४) को बजेट ल्याउने अन्तिम तयारी गरिरहेको छ । प्रदेश सभाबाट सरकारको नीति तथा कार्यक्रम र बजेटका सिद्धान्त र प्राथमिकता पारित भइसकेका छन् । आर्थिक मामिला तथा योजना मन्त्रालयले अहिले योजनाहरूलाई मन्त्रालयगत सूचना प्रणाली (पीएलएमबीआइएस) मा प्रविष्ट गर्ने कामलाई तीव्रता दिएको छ ।

सीमित स्रोत–साधन, घट्दो राजस्व र नागरिकका असीमित अपेक्षाबिच सन्तुलन मिलाएर बजेट ल्याउनुपर्ने दबाबमा प्रदेश सरकार छ । आर्थिक मामिला तथा योजनामन्त्री विदुरकुमार लिङ्थेपका अनुसार विगतका कतिपय नीतिगत त्रुटि सच्याउँदै, बहुवर्षीय आयोजनालाई पूर्णता दिने र सुशासन कायम गर्ने अठोटका साथ बजेट निर्माण भइरहेको छ ।