चुनावी गठबन्धनका कारण महिलाको प्रतिनिधित्व घटेकाे एमाले ‘महिला भेलाकाे निष्कर्ष

काठमाण्डाै – नेकपा एमालेको राष्ट्रिय महिला भेलाले चुनावी गठबन्धनका कारण कानुनले निर्धारण गरेको प्रतिनिधित्व घटेको निष्कर्ष निकालेको छ । हिजो र अस्ति काठमाण्डौमा चलेको भेलाले गठबन्धनको नाममा कानुनी छिद्रको दुरुपयोग गर्दै महिलाका लागि निर्धारित प्रतिनिधित्व घटाउने काम भएको निष्कर्ष निकालेको हो ।

चुनावी गठबन्धनका क्रममा दलहरूले पुरुषहरूलाई प्राथमिकता दिँदा महिलाको निर्वाचित हुने प्रतिनिधित्व घटेको भेलाको ठहर छ । भेलापछि एमालेले आज निकालेको विज्ञप्तिमा प्रतिनिधित्वसम्बन्धी कानुन संशोधन गर्न पार्टीको ध्यानाकर्षण गराइएको छ । विज्ञप्तिमा अब बन्ने प्रक्रियामा रहेको निर्वाचनसम्बन्धी कानूनलाई संविधानको धारा ३८ को मर्मअनुसार सबै तह र पदमा समानुपातिक उम्मेदवारीका आधारमा प्रतिस्पर्धा गर्न पाउने प्रावधानको सुनिश्चितता हुनुपर्ने माग गरिएको छ ।