चालु आर्थिक वर्षमा वैदेशिक रोजगारीका क्रममा ७८९ जनाको मृत्यु, ६६ जना अंगभंग

काठमाडौं । चालु आर्थिक वर्षमा वैदेशिक रोजगारीका सिलसिलामा ७८९ जनाले ज्यान गुमाएका छन् । खाडी मुलुकमा रोजगारीको प्रमुख गन्तव्य मानेर युवाहरू विदेशिँदा सरकारले आवश्यक सुरक्षा संयन्त्र र तालिमको व्यवस्था गर्न नसक्दा थप ६६ जना शारीरिकरूपमा अंगभंग भएका छन् ।

मृत्यु हुनेहरुमा ७६१ जना पुरुष रहेका छन् भने २८ जना महिला रहेका छन् । अर्थ मन्त्रालयले आइतबार सार्वजनिक गरेको चालु आर्थिक वर्ष २०७९/०८० को आर्थिक सर्वेक्षणअनुसार फागुन महिनासम्ममा कुल ५५ लाख २६ हजार सात सय चार नेपाली श्रम स्वीकृति लिएर विदेश गएका थिए । फागुनसम्म तीन लाख ३७ हजार एक सय ४४ जनाले श्रम स्वीकृति लिएका छन् । जसमा तीन लाख तीन हजार दुई सय ६५ जना पुरुष रहेका छन् भने ३३ हजार आठ सय ७९ जना महिला रहेको सर्वेक्षण प्रतिवेदनमा उल्लेख छ ।