अरूका लागि सुरक्षित घर बनाए, आफ्नै जोगाउन सकेनन्

आठबिसकोट, रुकुम पश्चिम — १७ वर्षकै उमेरमा मिस्त्रीको काम सिकेका जयबहादुर थापा घर बनाउन भारतको लद्दाखसम्म पुगे । आठबिसकोट नगरपालिका–१४ को छेपारे गाउँका उनी २०७२ को भूकम्पले ढलेका घर उठाउन सिन्धुपाल्चोक, काभ्रे, दोलखा र ललितपुर पुगे । उनीसहित रुकुम पश्चिम र जाजरकोटका १५ जनाको एउटा मिस्त्री टोली नै थियो ।

उनीहरूले ०७३ सालमा सिन्धुपाल्चोकका २ गुम्बा र ७ घर, ०७४ मा काभ्रेका १६, दोलखाका १० र ललितपुरका १२ घर बनाए । ती सबै भूकम्प प्रतिरोधी थिए ।