कोरला नाकाबाट आएका २,५०० भन्दा बढी विद्युतीय गाडी मुस्ताङमै रोकिए

मुस्ताङ । बाढीपहिरो र सडक कटानका कारण बेनी–जोमसोम सडक प्रभावित भएपछि चीनको कोरला नाकाबाट नेपाल भित्रिएका २ हजार ५०० भन्दा बढी विद्युतीय सवारीसाधन (ईभी) गन्तव्यमा पुर्‍याउन समस्या भएको छ। सडक सञ्चालनमा आए पनि अवस्था अझै सहज नहुँदा ती गाडी मुस्ताङका विभिन्न स्थानमा रोकिएका छन्।

असोज ११ गतेको भारी वर्षापछि बाढीपहिरो र नदी कटानले बेनी–जोमसोम सडक अवरुद्ध भएको थियो। त्यसयता कोरला नाकाबाट नेपाल ल्याइएका विद्युतीय गाडीको ढुवानी प्रभावित बनेको हो। शुक्रबार साँझदेखि सडकमा आवागमन सुरु भए पनि जोखिमपूर्ण अवस्थाका कारण सवारीसाधन गन्तव्यतर्फ पठाउन कठिनाइ भइरहेको छ।