एलेक्स होनोल्डको डर नभएको मस्तिष्क, खाली हात १०१ तल्ला चढ्ने साहसी

ताइवानको राजधानी ताइपेईको गगनचुम्बी भवन ‘ताइपेई १०१’ को काँच र स्टिलको चिप्लो भित्तामा झुन्डिएको त्यो मानव देख्दा लाग्थ्यो, त्यो कुनै चलचित्रको छायाँकन हो । तर, त्यो कुनै पर्दाको अभिनय थिएन । करिब ५०८ मिटर अग्लो र १०१ तल्लाको त्यो विशाल संरचना, जुन ताइवानको आर्थिक शक्ति र राष्ट्रिय गौरवको प्रतीक हो, त्यहाँ ४० वर्षीय अमेरिकी व्यावसायिक रक क्लाइम्बर एलेक्स होनोल्डले एउटा अकल्पनीय कीर्तिमान रचिरहेका थिए । न त उनको शरीरमा कुनै सुरक्षा डोरी, उपकरण थियो, न त कम्मरमा कुनै हार्नेस । २०२६ जनवरी २५ का दिन गरिएको त्यो ‘अर्बन क्लाइम्ब’ ले मानिसको शारीरिक क्षमतालाई मात्र चुनौती दिएको थिएन, मानव मस्तिष्कको त्यो तहको नियन्त्रणलाई समेत उजागर गरिदियो । जुन सामान्य मानिसका लागि सपना जस्तै हो ।

नेटफ्ल्क्सिले ‘स्काईस्क्रापर लाइभ’ मार्फत विश्वभरका करोडौँ दर्शकका मुटुको ढुकढुकी बढाउँदै त्यो दृश्य प्रत्यक्ष प्रसारण गरेको थियो । जहाँ होनोल्डले १ घण्टा ३१ मिनेटमा छतमा उक्लेर आफ्ना हातहरू विजयको मुद्रामा हावामा हल्लाएका थिए । त्यो कार्य केवल एउटा साहसिक कसरत मात्र थिएन, त्यो त मानव मस्तिष्कको जटिल कार्यप्रणाली र डरमाथिको पूर्ण विजयको एउटा जीवित प्रयोगशाला थियो । अमेरिकाको योसेमिटी राष्ट्रिय निकुञ्जमा रहेको ‘एल क्यापिटान’ जस्ता विशाल प्राकृतिक चट्टानहरूमा आफ्नो निडरता प्रमाणित गरिसकेका होनोल्डका लागि ‘ताइपेई १०१’ को कृत्रिम संरचना अर्को एउटा कठोर परीक्षा थियो । समुद्री हावाको तीव्र वेग र अनिश्चित मौसमका कारण निर्धारित समयभन्दा एक दिन ढिला सुरु भएको त्यो कार्य गर्ने क्रममा प्राविधिकहरूले प्रत्यक्ष प्रसारणमा केही सेकेन्डको ‘डिले’ राखेका थिए । त्यो सचेतना सम्भावित कुनै अप्रिय घटनालाई संसारसामु तत्काल रोक्नका लागि थियो । तर, होनोल्डको सटिक चाल र स्थिर स्वभावले कुनै पनि मानवीय वा प्राविधिक अवरोधले ठाउँ पाएन ।