बर्खायामसँगै चितवनको जिप सफारी रोकिँदै, पर्यटकका लागि मध्यवर्ती क्षेत्र विकल्प

चितवन । वर्षायामको आगमनसँगै नेपालको प्रमुख वन्यजन्तु पर्यटन गन्तव्य चितवन राष्ट्रिय निकुञ्जभित्र सञ्चालन हुँदै आएको जिप सफारी सेवा असार १७ गतेदेखि अस्थायी रूपमा बन्द हुने भएको छ। निकुञ्ज प्रशासनले वन्यजन्तुको प्रजनन अवधि, पर्यावरण संरक्षण तथा पर्यटक सुरक्षालाई ध्यानमा राख्दै असोजको पहिलो सातासम्म सफारी स्थगित गर्ने निर्णय गरेको हो।

निकुञ्जका सूचना अधिकारी अविनास थापामगरका अनुसार बर्खामा जंगलभित्रका कच्ची सडक हिलाम्य हुने, साना खोल्सा–खोल्सीमा बाढी आउने र रुख ढलेर मार्ग अवरुद्ध हुने सम्भावना उच्च रहने भएकाले नियमित जिप सफारी सञ्चालन सुरक्षित हुँदैन। यही समय अधिकांश वन्यजन्तु र चराचुरुङ्गीको प्रजनन मौसमसमेत भएकाले उनीहरूको प्राकृतिक गतिविधिमा न्यूनतम हस्तक्षेप होस् भन्ने उद्देश्यले सफारी बन्द गरिन्छ।