अझै ४० स्थानीय तहमा प्रमुख प्रशासकीय अधिकृत रिक्त

काठमाडौं । लामो समयदेखि सयौंको संख्यामा रिक्त रहेको स्थानीय तहको प्रमुख प्रशासकीय अधिकृतको पद केही मात्रामा भए पनि पूर्ति हुने क्रम शुरू भएको छ । यद्यपि, अझै ४० स्थानीय तह रिक्त अवस्थामा छन् ।

लोकसेवा आयोगबाट उत्तीर्ण भई ६ महिनादेखि नेपाल प्रशासनिक प्रशिक्षण प्रतिष्ठानमा तालिम लिएका अधिकृतलाई मङ्गलबारबाट सङ्घीय मामिला तथा सामान्य प्रशासन मन्त्रालयले स्थानीय तहमा नै पदस्थापन गर्न शुरू गरेको हो । लोकसेवा आयोगमा आएको नम्बर ६० प्रतिशत र प्रतिष्ठानमा तालिम लिएको मूल्याङ्कनलाई ४० आधार मानेर सोहीअनुसार योग्यताका आधारमा खाली रहेका ८० गाउँपालिकामा प्रमुख प्रशासकीय अधिकृत पठाइएको हो ।