युद्धविरामका बाबजुद इजरायलले लेबनानमा सैन्य कारबाही जारी राख्ने

काठमाडौँ । मध्यपूर्वी क्षेत्रमा युद्धविरामको प्रयास भइरहेका बेला इजरायल, इरान र लेबनानको सशस्त्र समूह हेजबुल्लाहबिचको सैन्य तनाव फेरि चुलिएको छ। इजरायली रक्षामन्त्री इजरायल काट्जले युद्धविरामका बाबजुद इजरायली सेनाले लेबनानमा हेजबुल्लाहविरुद्ध सैन्य कारबाही जारी राख्ने स्पष्ट पारेका छन्। टाइम्स अफ इजरायलका अनुसार रक्षामन्त्री काट्जले हेजबुल्लाहले इजरायली क्षेत्रमा थोरै मात्र पनि आक्रमण गरेमा सिधै लेबनानको राजधानी बेरुतमा विनाशकारी आक्रमण गर्ने चेतावनी दिएका छन्।

रक्षामन्त्री काट्जले पछिल्लो समय इरानले दिइरहेको चेतावनीलाई समेत ठाडो रूपमा अस्वीकार गरेका छन्। इजरायलमाथि फेरि आक्रमण गर्ने प्रयास गरिए इरानले यसअघिको भन्दा कडा प्रतिक्रियाको सामना गर्नुपर्ने काट्जले बताए।