बौद्धिक वर्ग सङ्गठित हुनुपर्नेमा जोड

काठमाडौँ, साउन २८ गते । नेपाली कांग्रेसका महामन्त्री एवं पूर्वस्वास्थ्यमन्त्री गगन थापाले देशका समृद्धिका लागि बौद्धिक वर्ग सङ्गठित हुनुपर्नेमा जोड दिनुभएको छ । नेपाली लेखक सङ्घ काठमाडौँ जिल्ला समितिको दोस्रो अधिवेशनको उद्घाटन गर्दै उहाँले सङ्घ बौद्धिक वर्ग सङ्गठित हुने माध्यम बन्न पनि सुझाउनुभयो ।

सङ्घले स्रष्टाको रचना वाचन गर्ने मञ्च उपलब्ध गराउनसमेत पहल गर्नुपर्ने बताउनुभयो । महामन्त्री थापाले आगामी भदौमा बिपी कोइरालाको साहित्यिक व्यक्तित्व र कृतिको सम्बन्धमा नयाँ पुस्तालाई जानकारी दिन र उहाँको बहुमुखी प्रतिभाबारे बहस/चर्चा गर्न बिपी साहित्य सम्मेलनको आयोजना गरिने पनि जानकारी दिनुभयो । सम्मेलनको व्यवस्थापन र संयोजनको जिम्मेवारी दिने सम्बन्धमा नेपाली लेखक सङ्घसँग छलफल गर्ने बताउनुभयो ।