पूर्वाधारसँगै कृषि र पशुपालन प्राथमिकतामा

तनहुँ- तनहुँको म्याग्दे गाउँपालिकाले पूर्वाधार निर्माणसँगै कृषि र पशुपालन क्षेत्रलाई प्राथमिकतामा राखेर विभिन्न कार्यक्रम सञ्चालन गरेको छ। स्थानीयको आवश्यकता र उत्पादनसँग जोडिएका योजनालाई प्राथमिकता दिँदै सडक, पुल, खानेपानी, सिँचाइ तथा कृषि र पशुपालनका क्षेत्रमा काम अघि बढाइएको हो।

गाउँपालिकाले एक वर्षको अवधिमा २.७५ किलोमिटर नयाँ सडकको ट्रयाक खोलेको छ भने ४.९५ किलोमिटर सडक ग्राभेल र १४० मिटर सडक कालोपत्र गरेको छ। ग्रामीण बस्तीलाई सडक सञ्जालमा जोड्दै यातायात सहज बनाउन नयाँ ट्र्याक खोल्ने तथा पुराना सडकको स्तरोन्नति गर्ने कामलाई निरन्तरता दिइएको गाउँपालिका अध्यक्ष श्रीप्रसाद श्रेष्ठले बताए।