भौगर्भिक सर्भे जरुरी

देशमा विकास निर्माणका काम मात्र ‘फिजिविलिटी’लाई ध्यानमा राखेर गरिँदा देशभरका सडकलगायतका पूर्वाधारका काम दिगो र भरपर्दो बन्न सकिरहेका छैनन् । वर्षौं चलेका सडकमा पनि कल्पना नगरिएका स्थानमा पहिरो खस्ने र भासिने क्रम बढ्दै गएको छ । जुगेडी नजिक खसेको पहिरोले लामो समयसम्म यात्रुलाई सास्ती दिएपछि बाटोको सर्भे गर्दा मात्र ‘फिजिविलिटी’लाई आधार बनाउनु कमजोरी हुने सम्बन्धित सबैलाई बोध हुन गएको छ । हाल दुईतर्फी सवारी चले पनि पानीको मात्रा बढेमा यसै भन्न सकिने अवस्था छैन ।

मनसुन सुरु भएको केही दिनमै यो सडक पहिरोका कारण घण्टौं बन्द हुन पुगेपछि सिंगो देशको जनजीवन अस्तव्यस्त हुँदै जान थालेको छ । रात्री तथा दिवा यात्राका क्रममा पहिरोमा पुरिएर मरिने त्रास त छँदै छ । त्यसमा पनि अति जरुरी कामकाज समयमै गर्न नपाएर देशभरका मानिसमा विचल्ली र प्रताडना पनि थपिइरहेको छ । अहिले पनि काठमाडौं राजधानी सहर मात्र नभएर सिंगो देशकै लागि सेवाप्रवाह हुने केन्द्रका रूपमा रहिआएको छ ।