कोदोले सहन सक्छ जलवायु परिवर्तनको असर

काठमाडौं : जलवायु परिवर्तनका कारण वर्षात्को शैली फेरिएको छ। लामो समय खडेरी पर्न थालेको छ। त्यसको प्रत्यक्ष असर धान, गहुँ र मकै बालीमा परिरहेको छ। तर, कोदो यस्तो बाली हो, जुन जलवायु परिवर्तनलाई ‘सहन’ गर्ने क्षमता राख्छ। जलवायुजन्य चरम मौसमी घटना (इक्सट्रिम इभेन्ट्स) सहन सक्ने क्षमता कोदोसँग रहेको अध्ययनहरूले देखाएका छन्। त्यसैकारण भविष्यमा विश्वकै प्रमुख खाद्यान्नको भरपर्दो बाली कोदो हुन सक्ने अध्येताहरूको निष्कर्ष छ।

संयुक्त राष्ट्रसंघले पनि सन् २०२३ लाई ‘अन्तर्राष्ट्रिय कोदोजन्य बाली वर्ष’ घोषणा गरेको छ। यस अवधिमा जलवायुमैत्री कोदोजन्य बालीको महत्त्वको बारेमा प्रचार गरिनेछ। कोदोजन्य बालीबाट बनेका परिकारको प्रवद्र्धन गरिनेछ। कोदो अन्य प्रमुख बालीहरूभन्दा सयौं गुणा पौष्टिक हुन्छ। चामलमा भन्दा तीन सय गुणा बढी क्याल्सियम हुन्छ। सयौं वर्ष अपहेलित र कुअन्न बनेको कोदो यतिबेला श्रीअन्न बनेको छ।