जर्मनी र फ्रान्सले रद्द गरे मिलेर नयाँ लडाकु विमान बनाउने परियोजना

बर्लिन । जर्मनी र फ्रान्सका नेताहरूले युरोपको सबैभन्दा महत्त्वाकाङ्क्षी रक्षा कार्यक्रममध्ये एक मानिएको नयाँ पुस्ताको लडाकु विमान बनाउने परियोजना अन्त्य गर्ने निर्णय गरेका छन् । परियोजनामा संलग्न रक्षा उद्योग कम्पनीहरूबिच लामो समयदेखि जारी विवाद समाधान हुन नसकेपछि दुवै देशले यो कदम चालेका हुन् ।

जर्मन चान्सलर फ्रेडरिक मर्ख र फ्रान्सेली राष्ट्रपति इमानुएल म्याक्रोँले गत साता मोन्टेनेग्रोमा आयोजित युरोपेली संघ–पश्चिमी बाल्कन शिखर सम्मेलनका क्रममा उक्त परियोजनाबारे छलफल गरेका थिए । जर्मन अधिकारीहरूका अनुसार परियोजनामा संलग्न कम्पनीहरूबिच महिनौँदेखि जारी गतिरोध अन्त्य हुने सम्भावना नदेखिएपछि मर्खले म्याक्रोँलाई संयुक्त लडाकु विमान निर्माण योजना अगाडि नबढाउन सुझाव दिएका थिए ।