आशिका तामाङले सडकमा धान रोप्दै गरेको भिडिओ भाइरल, के हो वास्तविकता ?

काठमाडौं । राष्ट्रिय स्वतन्त्र पार्टी (रास्वपा) की सांसद आशिका तामाङले सडकको बीच भागमा धान रोपेको एउटा भिडिओ यतिबेला सामाजिक सञ्जालमा भाइरल भइरहेको छ । धादिङको नौबिसे चोकस्थित हिलाम्मे सडकमा युवाहरूसँग मिलेर धान रोपेको उक्त भिडिओलाई लिएर सामाजिक सञ्जाल प्रयोगकर्ताले विभिन्न टीकाटिप्पणी गरेका छन् ।

‘Seven Star 4k’ नामक फेसबुक पेजले “असार १५ मा नौबिसे सडकमा धान रोप्दै आशिका” भन्ने क्याप्सनसहित यो भिडिओ सार्वजनिक गरेको छ । भिडिओमा तामाङले “नौबिसेको बाटो कत्रो ठुलो खाल्डो” भन्दै असारे गीत गाएर सडकको दुरावस्थाप्रति प्रतीकात्मक विरोध जनाएको देखिन्छ । वर्षौँदेखि सडक मर्मत नभएको विरोधमा उनले सडककै खाल्डोमा धान रोपेकी हुन् ।