‘फास्ट ट्र्याक’को सुरु विन्दू खोकनाको सट्टा फर्सिडोल

काठमाडौं । काठमाडौं–तराई–मधेश द्रुतमार्ग (फास्ट ट्र्याक)को खोकना विन्दू परिवर्तन हुने सम्भावना बढेको छ । राष्ट्रिय गौरवको आयोजनामा स्थानीय समुदायको धार्मिक सांस्कृतिक सम्पदा विषयलाई लिएर उत्पन्न विवादलाई गम्भीरतापूर्वक लिनुपर्ने बताउँदै अन्तरिम सरकारकी प्रधानमन्त्री सुशीला कार्कीले वैकल्पिक उपाय अपनाउन नेपाली सेनालाई निर्देशन दिएकी हुन् ।

उपत्यका र तराई जोड्ने ‘लाइफलाइन’का रूपमा मानिएको गौरवको आयोजनामा भएको ढिलासुस्ती विषयमा प्रधानमन्त्री कार्कीले नेपाली सेनालाई गम्भीर भएर कार्यान्वयनमा लैजान निर्देशन दिएकी हुन् । प्रधानमन्त्री कार्कीले निर्माणाधीन द्रुतमार्गको गत १३ माघमा निरीक्षण गरी विकास निर्माणका काम गर्दा स्थानीयका सरोकारलाई गम्भीरतापूर्वक लिनुपर्ने बताएकी थिइन् ।