समुदायमा क्षयरोग पहिचान गर्न खकार परीक्षण

दोलखा : भीमेश्वर नगरपालिका-२ मा समुदायस्तरमै क्षयरोग पहिचान गर्ने उद्देश्यले खकार परीक्षण कार्यक्रम सञ्चालन गरिएको छ। नेपाल क्षयरोग निवारण संस्था जिल्ला शाखा दोलखाको आयोजनामा शनिबार सञ्चालन गरिएको कार्यक्रममा स्थानीय बासिन्दाको खकार संकलन गरी परीक्षण गरिएको हो।

समुदायमै पुगेर परीक्षण गर्दा रोग लुकाएर बस्ने प्रवृत्ति न्यूनीकरण हुने र प्रारम्भिक अवस्थामै रोग पहिचान गर्न सहज हुने विश्वास आयोजकले लिएका छन्। क्षयरोग अझै पनि समाजमा चुनौतीपूर्ण रोगका रूपमा रहेको नेपाल क्षयरोग निवारण संस्था जिल्ला शाखा दोलखाका सभापति तीर्थबहादुर जोशीले बताए। क्षयरोग लुकाएर राख्नुभन्दा समयमै परीक्षण गरी उपचारमा जानु आवश्यक रहेको उनले बताए। ‘क्षयरोग लुकाएर होइन, पहिचान गरेर निदान गर्नुपर्छ भन्ने उद्देश्यका साथ समुदायमा पुगेर खकार परीक्षण कार्यक्रम सञ्चालन गरेका हौँ,’ सभापति जोशीले भने।