देउवालाई रेड कार्ड देखाउने विश्वप्रकाशको चेतावनी

काठमाडौं– नेपाली कांग्रेसका उपसभापति विश्वप्रकाश शर्माले पार्टी र राजनीति पनि खेलजस्तै विधि र नियमअनुसार चल्नुपर्ने बताएका छन्। झापा–१ काठमाडौं कप फुटसल प्रतियोगिताका क्रममा उनले राजनीतिमा गल्ती गर्ने नेताले पनि खेलाडीले जस्तै पहेँलो र आवश्यक परे रेड कार्ड पाउने चेतना राख्नुपर्ने बताए।

शर्माले विशेष महाधिवेशन र त्यसपछि सर्वोच्च अदालतको फैसलालाई मानेर अघि बढ्नुपर्ने भन्दै अदालतले कांग्रेसको केन्द्रीय समिति बदर नगरेको र सभापति गगन थापालाई हटाएको अवस्था नरहेको दाबी गरे। उनले आवेगमा आएर नेमप्लेट राख्दैमा कोही सभापति वा पदाधिकारी नहुने भन्दै पार्टी विधिभित्रै सञ्चालन हुनुपर्नेमा जोड दिए।