अद्यावधिक हुन नसकेको सामाजिक अध्ययन

सामाजिक अध्ययन भनेको समाजलाई केवल पढ्ने विषय होइन, समाजलाई बुझ्ने, बदलिँदो यथार्थलाई विश्लेषण गर्ने र जिम्मेवार नागरिक बन्न सिकाउने विषय हो। समाजशास्त्र, राजनीतिशास्त्र, इतिहास, भूगोल, अर्थतन्त्र, संस्कृति, वातावरण तथा नागरिक जीवनका विविध पक्षलाई एकीकृत रूपमा समेट्ने भएकाले यसको दायरा निकै फराकिलो छ।

विद्यार्थीलाई समाजका घटना र परिवर्तनलाई तथ्यका आधारमा बुझ्न, लोकतान्त्रिक मूल्य–मान्यता आत्मसात् गर्न तथा जिम्मेवार, सक्षम र उत्तरदायी नागरिकका रूपमा विकास गर्नु सामाजिक अध्ययनको मूल उद्देश्य हो। यसले व्यक्ति, परिवार, समुदाय, राष्ट्र र विश्वबीचको अन्तरसम्बन्ध बुझाउँदै राष्ट्रिय तथा विश्व नागरिकताको भावना, आलोचनात्मक सोच, निर्णय क्षमता, समस्या समाधान, सहकार्य, नेतृत्व र जीवनोपयोगी सीप विकास गर्न सहयोग पुर्‍याउँछ।