रेडपाण्डा संरक्षणमा जनचेतना जगाउन म्याराथन हुने

इलाम । रेडपाण्डा संरक्षणमा जनचेतना जगाउने र जैविक विविधता संरक्षणमा सहयोग गर्ने उद्देश्यले इलाममा रेडपाण्डा म्याराथन हुने भएको छ । दीपज्योति युवा क्लबको आयोजनामा हुने म्याराथन प्रतियोगिता इलाम सदरमुकामबाट सुरु भई सन्दकपुरमा पुगेर टुङ्गीने छ ।

पुरुष खुला, महिला खुला र स्थानीयतर्फ हुने प्रतियोगिता सन्दकपुरसम्म ४४.२ किलोमिटरको दूरीमा आयोजना गरिने आयोजकले जनाएको छ । स्थानीयतर्फको प्रतिस्पर्धामा चाहिँ रेडपाण्डा संरक्षणको काम भइरहेको इलाम, पाँचथर ताप्लेजुङका प्रतियोगी सहभागी हुन पाउनेछन् । प्रतियोगितामा महिला र पुरुष दुवैतर्फ पहिलो पुरस्कार समान एक लाख ५० हजार, दोस्रो एक लाख, तेस्रो ५० हजार र चौथो पुरस्कार २० हजार रुपैयाँ राखिएको आयोजक क्लबका राम रिमालले जानकारी दिए ।