चखेवा सडक खण्ड श्रमदानमार्फत मर्मत सुरु

खोटाङ । मध्यपहाडी लोकमार्ग अन्तर्गत सेखुवा झगरपुर–चखेवा सडक खण्डमा श्रमदान जुटाएर मर्मत गर्ने कार्य शुरू गरिएको छ । खोटाङको साकेला गाउँपालिकाको वडा नम्बर एकमा पर्ने करिब दश किलोमिटरको उक्त सडकलाई गाउँपालिका अध्यक्ष रवि प्रकाश राईको अगुवाईमा मर्मत कार्य सुरु गरिएको हो ।

राष्ट्रिय गौरवको आयोजनाको रूपमा रहेको उक्त सडक खण्ड लामो समय बितिसक्दा पनि सडक मर्मतका लागि केन्द्र सरकारले चासो नदेखाउँदा दैनिक यात्रा गर्ने हजारौं यात्रु तथा सवारी साधनले सास्ती खेप्नुपरेको छ । केही समयदेखि लगातार परेको वर्षाका कारण उक्त सडक खण्डमा हिलाम्मे भएर सवारी साधन आवतजावतमा समस्या हुँदै आएको छ । उक्त सडक हुँदै पूर्वी जिल्ला तथा राजधानी काठमाडौं आवतजावत गर्ने यात्रुहरूले सास्ती भोग्दै आएपछि पालिका आफैले श्रमदान जुटाएर मर्मत कार्य सुरू गरेको हो ।