गोविन्दलाई गोविन्दको समर्थन जुटाउने कसरत, स्वर्णिम रोक्न गगन मैदानमा

काठमाडौँ । नेपाली कांग्रेसले तनहुँ–१ को उपनिर्वाचनमा गोविन्दराज जोशी समूहको समर्थन जुटाउने प्रयास थालेको छ । २०७४ को आम निर्वाचनमा तनहुँ–१ मा कांग्रेसका तत्कालीन वरिष्ठ नेता रामचन्द्र पौडेललाई असहयोग गरेको भन्दै २०७५ मा पार्टीका पूर्व सहमहामन्त्री जोशीलाई साधारण सदस्य नरहे गरी कारबाही गरिएको थियो । तनहुँ–१ मा वैशाख १० हुने उपनिर्वाचनलाई लक्षित गरी कांग्रेसले आइतबार जोशी लगायतको कारबाही फुकुवा गरेको छ ।

कांग्रेसले तनहुँ–१ मा पार्टीका केन्द्रीय सदस्य गोविन्द भट्टराईलाई उम्मेदवार बनाएको छ । कांग्रेसमा ४५ वर्षदेखि सक्रिय राजनीति गरिरहेका भट्टराई पहिलो पटक प्रतिनिधिसभा निर्वाचन लड्दै छन् । २०३५ सालबाट कांग्रेसको भ्रातृ संस्था नेविसंघबाट राजनीति थालेका थिए । उनी नेविसंघको स्कुलको एकाइ, तनहुँ–काठमाडौँमा विद्यार्थीको जनसम्पर्क समिति र पब्लिक युथ क्याम्पसको एकाइ समितिलगायत विभिन्न जिम्मेवारीमा थिए ।