वर्षाले पाँचौं टी-ट्वान्टी रद्द : भारत र वेस्ट इन्डिजबीचको शृङ्खला २–२ को बराबरीमा

काठमाडौँ । बेङ्गलुरुमा भएको लगातारको वर्षाका कारण पाँचौं तथा निर्णायक खेल नतिजाविहीन बनेपछि भारत र वेस्ट इन्डिजबीचको पाँच खेलको टी–ट्वान्टी शृङ्खला २–२ को बराबरीमा सकिएको छ । यो नतिजासँगै घरेलु मैदानमा भारतको लगातार १२ शृङ्खला जित्ने चार वर्षे अपराजित यात्रामा पूर्णविराम लागेको छ । यसअघि सम्पन्न एकदिवसीय शृङ्खला भारतले २–१ ले जिते पनि दोस्रो ब्याटिङ गरेको एकमात्र खेलमा वेस्ट इन्डिजले ३५० रनको विशाल लक्ष्य सफलतापूर्वक पछ्याएको थियो ।

एम चिन्नास्वामी स्टेडियमको उत्कृष्ट ड्रेनेज प्रणालीका कारण वर्षा रोकिनेबित्तिकै खेललाई ९ ओभरमा छोट्याएर सुरु गरिएको थियो । टस जितेर वेस्ट इन्डिजले पहिले बलिङ रोजेको उक्त खेलमा ७.४ ओभरको मात्र खेल सम्भव भएको थियो ।