कञ्चनपुरका किसान धानबाली भित्र्याउन व्यस्त

कञ्चनपुर । मौसमी वर्षा बाहिरिएसँगै कञ्चनपुरका किसान धानबाली भित्र्याउन व्यस्त देखिन थालेका छन् । काटेर राखेको धान वर्षाका कारण भिजेपछि धान सुकाउनेदेखि काट्ने, थन्क्याउने, थ्रेसिङ गर्नेलगायत कार्यमा यहाँका किसान व्यस्त भएका हुन् । असोजको दोस्रो सातासम्म लगातार परेको वर्षाका कारण खेतमा काटिएको धान भिजेर बिग्रिने अवस्था भएको थियो ।

कृष्णपुर नगरपालिका–३ नयाँबस्तीका किसान टङ्कलाल चौधरीले वर्षाले भिजाएको धान सुकाउने र थ्रेसिङ गर्ने काममा व्यस्तता बढेको बताए । “पावर टिलरले काटेको एक बिघा खेतको धानबाली खेतमा भिजेर उम्रिने डर थियो”, उनले भने, “अहिले घाम लागेपछि धान थ्रेसिङ गर्न पाएका छौँ, थ्रेसिङ गरेको धान सुकाएर घरभित्र राख्ने कार्य चलिरहेको छ ।”