रूपन्देहीको मर्चवारीका चिया पसलमा अब ‘माटाका कप’

भैरहवा — एक समय मुलुकका ग्रामीण क्षेत्रमा कुमाल समुदायले तयार गरेका माटाका भाँडाको माग थियो । पानी पिउने सुराहीदेखि मकै भुट्ने हाँडीसम्म उनीहरूले बनाउँथे । चिसो पानीका लागि माटाको गाग्रीदेखि पैसा जम्मा गर्ने खुत्रुके (भुड्की) अहिले पनि लोकप्रिय छन् । परम्परागत सीप उपयोग गरेर जीविकोपार्जन गर्दै आएको कुमाल समुदाय अहिले संकटमा परेको छ ।

बजारमा माटाको सट्टा फलाम र प्लास्टिकका भाँडाकुँडाको प्रयोग बढेपछि उनीहरू समस्यामा परेका हुन् । कुमाल समुदायले निर्माण गरेका माटाका मूर्ति अहिले पनि विदेशीले खरिद गर्छन् । उनीहरूले तयार गरेका माटाका कप (बट्टा) को माग अहिले बढिरहेको छ । माटाको कपमा चिया पिउने प्रचलन अहिले सहरबजारमा मट्का चिया भनेर प्रख्यात छ । यस्तै आकर्षण देखेर रूपन्देहीको मर्चवारी गाउँपालिकाले कुमाल समुदायको सीप प्रवर्द्धन योजना तयार गरेको हो ।