बैंकिङ कसूर र चेक अनादरका १४ मुद्दामा फरार व्यक्ति पक्राउ

काठमाडौँ । नेपाल प्रहरीको केन्द्रीय अनुसन्धान ब्युरो (सीआईबी) ले बैंकिङ कसूर र चेक अनादर गरी कूल १४ वटा मुद्दामा फरार रहेका एक व्यक्तिलाई पक्राउ गरेको छ।

पक्राउ पर्नेमा बुढानीलकण्ठ नगरपालिका वडा नम्बर ५ (साविक विष्णु गाविस वडा नम्बर ८) का ४७ वर्षीय राजु मिजार रहेका छन्। उनी काठमाडौँको धुम्बाराहीबाट पक्राउ परेका हुन् ।

सीआईबीका अनुसार मिजार विरुद्ध काठमाडौँ जिल्ला अदालतले विभिन्न मितिमा १२ वटा बैंकिङ कसूर र दुई वटा चेक अनादर मुद्दामा फैसला सुनाएको थियो। ती फैसलाहरू अनुसार उनले कूल २ करोड ५८ लाख ६२ हजार ७१६ रुपैयाँ बिगो तिर्नुपर्ने देखिएको छ।

अदालतको फैसला बमोजिम उनले बिगोका अतिरिक्त ४३ लाख २३ हजार ५३४ रुपैयाँ ८० पैसा जरिवाना र १ लाख ७२ हजार ९४१ रुपैयाँ ३९ पैसा क्षतिपूर्ति समेत बुझाउनु पर्ने ब्युरोले जनाएको छ।

यसका साथै उनलाई अदालतले ९० दिनको कैद सजाय समेत तोकेको थियो। सजाय तोकिएदेखि नै फरार रहेका मिजारलाई ब्युरोबाट खटिएको विशेष टोलीले सोमबार धुम्बाराहीबाट नियन्त्रणमा लिएको हो।

ब्युरोका सह-प्रवक्ता प्रहरी उपरीक्षक योगेन्द्र कुमार खड्काले पक्राउ परेका मिजारलाई फैसला कार्यान्वयनका लागि मङ्गलबार काठमाडौँ जिल्ला अदालतमा उपस्थित गराइएको जानकारी दिए।