१२ शय्याबाट थालनी भएको यात्रा : करोडौँ आँखामा दृष्टिको उज्यालो छर्दै

तत्कालीन समयमा पूर्वी नेपालका नागरिकलाई आँखामा समस्या देखिए उपचारका लागि काठमाडौँ अथवा भारतका विभिन्न सहर पुग्नुपर्ने बाध्यता थियो। उपचारका लागि लाग्ने खर्च, लामो यात्रा र काम छाडेर अस्पताल बस्नुपर्ने कठिनाइले आर्थिक अवस्था कमजोर भएका परिवारलाई थप पीडा दिन्थ्यो। समयमै उपचार नपाउँदा सामान्य समस्या पनि जटिल बन्ने र दृष्टि गुमाउनुपर्ने जोखिम उत्तिकै थियो।

यस अवस्थाको अन्त्य गर्दै पायक पर्ने स्थानमा आँखा उपचार सेवा दिने उद्देश्यले सिरहाको लहानमा सुरु गरिएको आँखा उपचार केन्द्र बिरामीका लागि ठुलो भरोसाको केन्द्र बनेको छ। आँखा उपचार सेवा लिन अन्यत्र जानुपर्ने बाध्यता हटेको छ भने भारतबाट सेवा लिन आउने बिरामीको चाप दिनप्रतिदिन बढेको छ। सुरुमा १२ शय्याबाट सेवा थालेको यो केन्द्र पछि सगरमाथा चौधरी आँखा अस्पतालका रूपमा विकास भयो र यसको सेवा विराटनगरसम्म विस्तार भयो।