नेपालमा फस्टाउँदै ईभी पूर्वाधार : देशभर २३ सय चार्जिङ स्टेसन

काठमाडौं । नेपालमा विद्युतीय सवारी साधन (ईभी) को प्रयोग तीव्र रूपमा बढेसँगै यसको भौतिक पूर्वाधार र डिजिटल सहायता प्रणाली दुवैमा उत्साहजनक विस्तार देखिएको छ । नेपाल विद्युत् प्राधिकरण र निजी क्षेत्रको संयुक्त प्रयासमा देशभर चार्जिङ स्टेसनको सञ्जाल फैलिएको छ । अर्कोतिर चालकहरूलाई चार्जिङ स्टेसन भेट्टाउनका लागि डिजिटल प्लाटफर्महरू पनि सार्वजनिक भइरहेका छन् ।

नेपाल विद्युत् प्राधिकरणका अनुसार हाल देशभर कुल २३ सयभन्दा बढी चार्जिङ स्टेसनहरू सञ्चालनमा रहेका छन् । प्राधिकरणका सहायक प्रबन्धक सागरमणि ज्ञवालीका अनुसार प्राधिकरण आफ्नै ६२ वटा र निजी क्षेत्रका २२३८ वटा स्टेसन सञ्चालनमा छन् । ‘भोटेकोशी बाढीका कारण नुवाकोट र स्याफ्रुबेसीका ३ वटा स्टेसन प्रभावित भए पनि बाँकी सबै स्टेसनहरू देशभर सञ्चालनमा छन्,’ उनले भने, ‘निजीतर्फ अधिकांश सवारी बिक्रेता कम्पनीहरू तथा होटलहरूले आफ्नै पहलमा चार्जिङ स्टेसन सञ्चालन भइरहेका छन् ।’