एमाले विधान महाधिवेशन : ओली आकांक्षा संस्थागत गर्ने मञ्च, प्रतिनिधिहरू निरीह

काठमाडौं । नेकपा एमालेको दोस्रो विधान अधिवेशन अध्यक्ष केपी शर्मा ओलीको आकांक्षा र चाहनालाई पार्टीमा संस्थागत गर्ने मञ्च बनेको छ । सघन छलफल र बहसमार्फत सामूहिक हितका लागि नीति निर्माण गर्ने स्थल भए पनि प्रतिनिधिहरूले सशक्त भूमिका निर्वाह नगर्दा सिंगो महाधिवेशन हल व्यक्ति केन्द्रित नीति निर्माणको केन्द्र बनेको हो ।

विधान महाधिवेशन सुरु हुनुअघि संस्थापन इतर पक्षका नेताहरूले अध्यक्ष ओलीका कार्यशैली र निर्णयमा आधारित रहेर प्रश्न उठाएका थिए । महाधिवेशनको हलमा भने उनीहरूको प्रस्तुति निकै फितलो हुन पुग्यो । पदाधिकारी तहकै नेताबाट फरक मत राख्ने छलफल भए पनि हलमा उनीहरू मौन रहे । उपाध्यक्ष सुरेन्द्र पाण्डेले यस विषयमा वरिष्ठ उपाध्यक्ष ईश्वर पोखरेललाई अनुरोध समेत गरेका थिए ।